మహిళల ఆసియా కప్ గెలిచినా ట్రోఫీకి నో.. అస‌లు విష‌యం చెప్పిన భారత హెడ్ కోచ్!

దుబాయ్ వేదికగా జరిగిన మహిళల ఆసియా కప్ టోర్నీలో మరోసారి ట్రోఫీ వివాదం చోటుచేసుకుంది. శ్రీలంకను 72 పరుగుల తేడాతో ఓడించి భారత మహిళల జట్టు రికార్డు స్థాయిలో ఎనిమిదోసారి ఆసియా కప్ టైటిల్‌ను కైవసం చేసుకుంది. అయితే, పాకిస్థాన్‌కు చెందిన ఏసీసీ చైర్మన్ మొహ్సిన్ నఖ్వీ చేతుల మీదుగా ట్రోఫీని స్వీకరించేందుకు భారత జట్టు నిరాకరించింది.

ఆదివారం జరిగిన ఫైనల్ మ్యాచ్ అనంతరం ప్రెజెంటేషన్ కార్యక్రమానికి హర్మన్‌ప్రీత్ కౌర్ నేతృత్వంలోని భారత జట్టు మైదానంలోకి రాలేదు. దీంతో వరుసగా రెండో ఏడాది కూడా ఆసియా కప్ ట్రోఫీ ప్రదానం నిలిచిపోయింది. గతేడాది భారత పురుషుల జట్టు కూడా ఇదే విధంగా మొహ్సిన్ నఖ్వీ నుంచి ట్రోఫీని, పతకాలను స్వీకరించేందుకు తిరస్కరించిన విషయం తెలిసిందే.

ఈ ఘటనపై మ్యాచ్ అనంతరం భారత జట్టు హెడ్ కోచ్ అమోల్ ముజుందార్ స్పందించాడు. "మేం అధికారికంగా ఆసియా కప్ ఛాంపియన్లం. ట్రోఫీ ఉందా? లేదా? అన్నది మాకు ముఖ్యం కాదు. పాక్ చైర్మన్ నుంచి ట్రోఫీ తీసుకోకపోవడం బీసీసీఐ వైఖరి. దీనిపై మేం ఏమీ మాట్లాడలేం" అని స్పష్టం చేశాడు.

పాకిస్థాన్ క్రికెట్ బోర్డుకు (పీసీబీ) కూడా అధ్యక్షుడిగా ఉన్న మొహ్సిన్ నఖ్వీ, ఆ దేశ అంతర్గత వ్యవహారాల మంత్రిగా కూడా బాధ్యతలు నిర్వర్తిస్తున్నారు. గతేడాది పురుషుల జట్టు తిరస్కరించిన ట్రోఫీ ఇప్పటికీ ఏసీసీ కార్యాలయంలోనే ఉండటం గమనార్హం. తాజా విజయంతో భారత మహిళల జట్టు ఛాంపియన్‌గా నిలిచినా, ట్రోఫీ వ్యవహారం మాత్రం అసంపూర్తిగానే ముగిసింది.